Marta Fernández-Tapias anuncia obras en la cubierta del pabellón polideportivo CEP plurilingüe Iglesia-Valadares por más de 230.000 euros

|

  • A delegada territorial da Xunta en Vigo explicou que os traballos consistirán na renovación integral da cuberta e a substitución de todos os caleiros e baixantes do edificio, así como das carpinterías exteriores e luminarias do centro educativo


A delegada territorial da Xunta en Vigo, Marta Fernández-Tapias, anunciou hoxe obras na cuberta do pavillón polideportivo CEP Plurilingüe Igrexa-Valadares por un importe de 231.036,04 euros e un prazo de execución de dous meses.

Durante unha visita ao centro educativo na que estivo acompañada polo xefe territorial da Consellería de Cultura, Educación e Universidade, César Pérez Ares, a representante autonómica enmarcou esta intervención no conxunto de actuacións previstas pola Xunta de Galicia para levar a cabo ao longo deste ano nas distintas infraestruturas escolares da Comunidade.

A finalidade da actuación é a mellora do pavillón polideportivo do CEP Plurilingüe Igrexa-Valadares, incluíndo substitución de cuberta por unha de panel sándwich de dobre chapa de aceiro. Sobre os traballos que se executaran, Fernández-Tapias detallou que se aproveitara esta renovación integral da cuberta para a substitución dos caleiros e baixantes do edificio.

Así mesmo, renovaranse as carpinterías exteriores do pavillón e colocaranse unhas novas de aluminio con rotura de ponte térmica e vidro dobre baixo emisivo, aplicarase illamento térmico de fachada mediante a aplicación de sistema SATE (Sistema de Illamento Térmico polo Exterior) e instalarase revestimento acústico no interior das fachadas.

Por outra banda, substituiranse as luminarias por unhas novas de sistema LED e pintaranse as portas metálicas.

Neste sentido, a delegada territorial indicou que as novas intervencións que promove a Xunta en infraestruturas escolares apostan por un modelo de centros “pensados e configurados para afrontar os retos educativos do futuro que, ademais das necesidades académicas, inclúen tamén as sanitarias e as tecnolóxicas”, recollido no Plan de Nova Arquitectura Pedagóxica que recibirá unha inxección económica de 191 millóns de euros para esta lexislatura.

Nova Arquitectura Pedagóxica

O Plan de Nova Arquitectura Pedagóxica de Galicia pivota nunha parte académica (con espazos ao servizo dos proxectos educativos, sobre todo vinculados á transformación dixital e xeradores de inclusión), nunha parte infraestrutural (con espazos máis amplos, saudables e unha maior integración coa contorna) e nunha parte de sustentabilidade acorde coas novas esixencias de eficiencia enerxética e respecto medioambiental.

No que atinxe ás infraestruturas propiamente ditas, as novas reformas, acondicionamentos e construcións seguirán unhas pautas construtivas homoxéneas, cunha identidade corporativa específica, aínda que axustada ás contornas nas que se inxiren, sexan do ámbito rural ou urbano.

A rede de centros de ensino públicos en Galicia está formada por máis de 1.000 colexios e institutos repartidos desde os concellos máis pequenos do rural (con menos de 2.000 habitantes) ata as grandes cidades. De feito, nove de cada dez concellos contan cunha infraestrutura educativa para servizo dos seus cidadáns.

20210702CubertaCEPIgrexaValadares



Comentarios